Chò Kang á Lâng 做工á人

瘦猴hit pêng是bat-tah sa--leh烏白hut，烏mo͘--ê mā閃mā擋，ta̍k不時，siòng tio̍h khang-phāng to̍h kā瘦猴cheng--1-ē。A鳳hit pêng，hun吹ná kòng ná配合時機出脚踢，mā kah紅mo͘--ê phah kah難分難解，chit ê紅mo͘--ê jú phah koh jú歡喜，一直chhiàng講「Koh來！Koh來！無夠！無夠！」正港是標準ê sio-phah雞á，看--起-來phah kah真享受。2 pêng看--起-來lóng無人占贏，5分á 5分。Chit時A明拖2 ê布袋過--來，表情真hiau-pai kā A郎講：「戰爭beh贏to̍h ài看我che hái-kho͘-lah-suh ê妙計，我chit ê軍師m̄是紙糊--ê lah。」A郎問講：「你拖he是siáⁿ？」A明應講：「錦囊！」Sòa--lòe無ke講話，2 kha布袋內ê mi̍h出力對2 ê tng teh sio-phah ê所在phiaⁿ--過。Mi̍h-kiāⁿ落地瘦猴kah A鳳sûi poa̍h倒，烏mo͘--ê kah紅mo͘--ê soah kui叢好好khiā在在，瘦猴kah A鳳詳細看chiah知影ka-tī踏tio̍h kin蕉皮，oa̍t頭to̍h看tio̍h A明1手the̍h 1 kha布袋。A鳳先發作，罵講：「你chit ê無路用ê狗頭軍師，你到底是toh 1 pêng--ê！」瘦猴mā罵講：「等--leh我chia phah soah你to̍h知死！」Liân A郎mā用冷kah kiōng beh ē結冰ê眼神kā A明gîn。A明人sûi bih kah hn̆g遠，tiām-tiām lóng m̄敢出聲。

A伯沿路行沿路講：「瘦猴生理做kài大，主要是做進出口，伊有船隊teh經營，算是港區chit-kho͘-ûi-á ê頭人。」Chiū án-ne， 3 ê人tòe伯--á oat過來koh se̍h過去，koh經過1條巷á， e̍h kah連對面有人行--來to無才調sio閃，ài 2人lóng貼壁，硬chiⁿ chiah chiⁿ ē過。Che路án-ne-seⁿ，有影ē記無路來。In行到1間kài大間ê樓á厝頭前ê時，a伯停--落-來，講：「瘦猴ê公司to̍h tī chia，lín chiah hâm伊研究看māi--leh，我先laih。」3 ê人kā伯--á seh多謝，A鳳知影伯--á有食hun，mā ùi phāiⁿ-á the̍h 1 pau hun絲送hō͘ a伯，講：「Che goán故鄉ê hun絲請你食，真ló͘-la̍t，感謝neh！」A伯mā無推辭，hun絲接--leh順手to̍h袋tī褲袋á，講：「Kah hiah客氣，多謝--lah！」無koh ke講siáⁿ，人oat--leh to̍h ùi原路行--轉-去，海口人to̍h是chiah a-sá-lih koh親切。